Chofe Kay ak Ekonomize Kouran

Sa depann de akò lwaye w la, ou ka responsab pou peye chofaj kay la. Kouran pou chofaj koute chè, epi si w ap viv yon kote ki fè frèt anpil oswa si se yon peryòd ivè a rèd, bòdwo chofaj ou yo chak mwa ka monte byen wo. Se poutèt sa ou dwe gen yon plan pou ekonomize enèji ak sove lajan pandan w ap kenbe kay ou a nan yon tanperati ki konfòtab. Si w ap chofe ak elektrisite oswa gaz, w ap resevwa yon bòdwo chak mwa nan men konpayi kouran sa. Si yo chofe kay w ap lwe a ak lwil oswa pwopàn, epi se ou ki responsab pou peye chofaj la, w ap peye pou yo ranpli tank lan lè li vin vid. Tank yo gen yon aparèy mezi sou yo ki montre lè lwil oswa gaz la vin ba. Mèt kay la oswa ajans k ap jere pwopriyete a ap bay ba w enstriksyon sou kijan ak kilè pou ranpli tank yo.

Mete Bon Tanperati Anndan Kay ou 

Youn nan pi bon fason pou ekonomize enèji ak lajan pandan mwa fredi yo se itilize tèmosta a ak sajès si ou gen youn nan apatman oswa kay ou a. Yon tèmosta se yon ti bwat yo monte sou mi kay la ki gen yon tèmomèt ladan l ki ouvri ak fèmen chofaj la otomatikman pou kenbe kay ou nan tanperati w chwazi a. Anpil tèmosta ka pwograme pou bese tanperati a epi ekonomize enèji lè w pa lakay oswa lannwit pandan w ap dòmi. Lè w pwograme tèmosta w la oswa lè w bese tanperati a ak men w, sa ap fè w ekonomize anpil lajan sou bòdwo chofaj la.

Kòmanse mete tèmosta a nan 68° Farenay (20° Sèlsiyis) lè w lakay. Si w wè bòdwo chofaj ou yo twò wo, ou ka eseye mete l nan yon tanperati ki pi ba epi mete plis rad sou ou. Ou ka ekonomize jiska 3% sou bòdwo enèji w la pou chak degre w bese tèmosta a. Pwograme oswa mete tèmosta a nan 62° Farenay (17° Sèlsiyis) lè w ap dòmi. Remonte l nan tanperati w renmen pou lajounen an, apeprè yon demi-è anvan fanmi an leve. Si pa gen moun lakay pandan kèk è nan jounen an paske tout moun nan travay oswa lekòl, pwograme oswa bese tèmosta a nan 62° Farenay (17° Sèlsiyis), epi aprè sa remonte l nan 68° Farenay (20° Sèlsiyis) lè moun yo rantre lakay. 

ENPÒTAN! Pa janm fèmen chofaj la nèt nan sezon fredi. Si w ap kite kay la, fikse li ant 55° jiska 60° Farenay (13° jiska 15° Selsiyis). Si w fèmen chofaj  la nèt, tiyo dlo yo ka jele epi yo ka kase, epi se ou menm ki pral gen pou pou peye repare plonbri a ak tout dega dlo a kapab fè. Sa ka koute ou plizyè milye dola. 

Gen kèk kay ki gen chofaj elektrik ki bati nan mi chanm yo. Fèmen chofaj sa yo nan chanm ou pap itilize, men pa fèmen yo nan kizin ak twalèt pou tiyo dlo yo pa jele. 

Si w ap itilize chofaj elektrik pòtab pou ba ou plis chalè: 

• Pa janm kite yo limen si w pa nan chanm nan.
• Pa itilize yon plòg alonj lè w ap itilize chofaj sa yo.
• Deploge yo lè w pa ap itilize yo.
• Kenbe bagay ki ka pran dife tankou rad, papye, oswa mèb omwen twa pye lwen chofaj la.

Sonje chofaj elektrik pòtab yo itilize anpil kouran. Sèvi ak yo sèlman lè sa nesesè.