Egzamen Sante Fanm, Pati 2: Sa K Ap Pase Lè Ou Ale

Ozetazini, doktè yo rekòmande pou fanm ki gen rapò seksyèl oswa ki gen plis pase 21 an fè yon "Egzamen Byennèt Fanm" chak ane. Egzamen sante fanm yo se yon opòtinite pou egzamine sante jeneral yon fanm. Sa gen ladan sante fizik, sante mantal, ak sitiyasyon sosyal. Egzamen fizik la ka gen ladan yon tchèk wotè ak pwa ou, tansyon ak batman kè ou, yon revizyon vaksen ou yo ak lòt tès ki baze sou kijan ou santi ou. Egzamen sa yo anjeneral gen ladan yo twa bagay tou: yon egzamen tete, yon egzamen basen, ak yon tès Pap.

Premye bagay ki rive nan yon Egzamen  Sante Fanm se anrejistreman nan biwo akèy la. Sa vle di ou ale nan biwo akèy la epi bay anplwaye yo non ou pou yo ka konnen ou rive. Anplwaye yo ka ba ou papye pou ranpli ak kesyon sou istwa medikal fanmi ou, nenpòt medikaman w ap pran, enfòmasyon demografik jeneral, sik règ ou, si ou te deja fè sèks oswa ou pa, epi si ou te ansent anvan.

Si w  bezwen èd pou li epi ranpli papye yo nan lang ou, yon entèprèt ta dwe kapab ede ou. Si pa gen yon entèprèt la an pèsòn oswa si  bezwen rele yo nan telefòn, kenbe papye yo jiskaske entèprèt la nan telefòn. Ou ka mande pou yon entèprèt fi si sa fè ou pi alèz.

Apre ou fin anrejistre, ou pral tann yo site non w nan lobi a. Lè yo rele non ou, yon asistan medikal oswa yon enfimyè ap akonpaye ou nan zòn egzamen klinik la epi pran wotè ou, pwa ou ak tansyon ou. Y ap poze ou kesyon tou sou pwoblèm sante ou, istwa medikal ou, ak istwa medikal fanmi ou. Y ap bay founisè swen medikal la enfòmasyon sa a.

Anvan egzamen an, asistan medikal la oswa enfimyè a ap ba ou yon rad medikal pou ou chanje. Y ap kite sal la pou ba ou vi prive pandan w ap chanje. Yon fwa ou pare, ou ka chita epi tann sou tab egzamen an. Souvan gen yon fèy papye sou tab egzamen an, ke ou ka dewoule epi mete sou janm ou pou plis vi prive.

Lè founisè swen medikal la vini, premye bagay y ap fè se revize enfòmasyon yo ba li a epi pale avè w sou nenpòt pwoblèm sante ou ka genyen. Yo ka poze w kèk kesyon tankou:

• Kilè ou te genyen dènye règ ou?
• Eske ou aktif seksyèlman?
• Eske w ap itilize nenpòt kalite kontrasepsyon?
• Eske ou panse ou ta ka ansent?

Kesyon sa yo ap ede founisè medou a ba w swen ki pi bon pou ou. Li enpòtan pou gen yon founisè medikal ou ka fè konfyans. Si w pa santi w alèz ak founisè medikal ou a, konsidere chanje founisè ke ou santi w alèz avè l.

Apre sa, founisè medikal la anjeneral ap fè yon egzamen tete. Yo fè egzamen sa a pou tcheke si gen nenpòt anomali, tankou boul oswa chanjman ki ta ka mande plis tès. Egzamen tete se youn nan fason ki pi enpòtan pou detekte kansè nan tete. Pi bonè yo jwenn kansè nan tete, se pi fasil pou trete li. Apre egzamen tete a, founisè medikal la gen plis chans pou fè yon egzamen basen ak yon tès Pap. Yon egzamen basen se yon pati regilye nan egzamen byennèt ou a, kote founisè medikal la tcheke sante ògàn repwodiktif ou yo. Pandan egzamen basen an, founisè medikal la ka fè yon tès Pap pou wè si gen nenpòt chanjman anòmal sou kòl matris ou andedan vajen ou ki ta ka mennen nan kansè nan kòl matris.

Y ap mande w pou w kouche sou tab egzamen an epi mete pye w nan sipò pye yo ke yo rele etriye. Sa pèmèt doktè a wè rejyon basen an. Doktè ap egzamine deyò vajen an. Apre sa, y ap egzamine anndan an. Pou tès Pap la, founisè medikal la ap itilize yon ti bwòs pou retire yon echantiyon dousman nan kòl matris la ak dèyè vajen an. Yo voye echantiyon sa a nan yon laboratwa pou yo egzamine li. Pandan tan sa a, yo ka fè tès ou tou pou nenpòt enfeksyon.

Pandan w nan menm pozisyon an, doktè a ap egzamine rejyon basen an pou wè si gen anomali. Paske ou pa ka wè ògàn basen yo tankou matris la ak ovè yo soti deyò kò a, doktè a ap itilize men l pou l santi zòn vant lan ak basen an. Sa ede tcheke gwosè ak fòm matris la ak ovè yo epi pou tcheke si gen nenpòt zòn sansib oswa kwasans anòmal.

Doktè a ta dwe eksplike w diferan pwosedi ki nan egzamen an. Ou ka poze kesyon tou nenpòt ki lè pandan randevou w la, menm nan mitan yon pwosedi. Sa a se vre tou pou eksprime malèz oswa ezitasyon sou pwosedi yo. Konfò ou trèzenpòtan epi fè    doktè ou konnen kesyon oswa enkyetid ou yo ede yo ba ou pi bon swen  ki posib yo.

Apre egzamen yo fini, doktè ap ba w nenpòt enfòmasyon yo ka pataje imedyatman. Si yo te pran nenpòt echantiyon, y ap di ou ki lè ou ka espere rezilta yo. Lè randevou a rive nan fen, founisè medikal la ap pale sou sa pou fè apre. Sa ka gen ladan swiv enstriksyon espesifik lakay ou, pran yon dezyèm randevou, oswa wè yon lòt doktè. Apre sa, y ap kite sal la pou ou ka abiye an prive. Doktè a ka diskite tou, sou opsyon kontrasepsyon ak divès mòd kontrasepsyon ki disponib pou ou. Se ou menm ki chwazi pou fè konvèsasyon sa a oswa aksepte rekòmandasyon yo pou kontrasepsyon.

Li enpòtan pou fè yon egzamen sante fanm chak ane pou detekte pwoblèm sante bonè. Lè w fè sa, enkyetid sa yo ka pi fasil pou geri oswa jere. Se yon moman enpòtan ak prive tou pou pale ak yon founisè medikal sou enkyetid sante ou oswa pou poze kesyon, pou ou ka gen enfòmasyon ou bezwen pou pran swen sante ou.

Eske ou te rate Pati 1 seri sa a? Li "Ki sa ki yon Egzamen Sante pou Fanm?"