Aktivite ak Kan pou Timoun pandan ete a

​​Sezon ete a se yon bon moman pou jèn yo eseye nouvo aktivite, aprann nouvo konpetans, epi kreye bèl souvni. 

​Ozetazini, gen anpil pwogram ete  ki diferan epitou ki  disponib pou elèv depi jadendanfan rive nan 12yèm ane. Gen kèk pwogram ki gratis oswa ki pa koute chè. Gen lòt ki konsantre sou konpetans espesyal epi ki ka koute plis. Gid sa a pral ede w konprann ki kalite pwogram fanmi ou ka jwenn. 

​Pwogram Gratis ak Pri Abòdab

​Pwogram nan Lekòl Piblik ak Aprantisaj Pou Ete a 

​Anpil lekòl piblik lokal yo ofri pwogram ete gratis oswa a yon pri abòdab. Pwogram sa yo ka ede elèv ki bezwen sipò siplemantè nan matyè lekòl yo oswa ki vle amelyore anglè yo. Gen kèk lekòl ki bay tou manje ak transpò gratis (tankou yon bis) pou ale ak pou soti nan pwogram nan. 

​Bibliyotèk ak Sant Kominotè 

​Bibliyotèk piblik ak sant kominotè nan zòn ou an souvan gen aktivite ete gratis. Sa yo ka gen ladan pwogram lekti, atelye pou aprann sou syans ak teknoloji (pafwa yo rele STEM), kou atizana, ak lòt evènman kote timoun yo ka ale.  

​YMCA ak Boys & Girls Clubs 

​Sa yo se òganizasyon byen koni atravè peyi a. Yo ofri kan pou lajounen pandan ete a ki abòdab. Yon kan pou lajounen se yon pwogram kote timoun yo ale pou jounen an epi retounen lakay yo nan aswè. Òganizasyon sa yo ka ofri èd finansye tou. Montan ou peye a ka chanje selon revni fanmi ou (pafwa yo rele sa yon "frè glisman"). Pwogram yo souvan gen ladan yo espò, atizana, syans, ak aktivite ki ede timoun yo vin lidè. 

​Depatman Pak ak Lwazi Vil la 

​Gouvènman vil lokal ou a ka ofri kan pou lajounen, ekip espòtif, ak aktivite deyò ki pa koute chè oswa gratis, sitou pou rezidan vil sa a. 

​Opsyon ki soti nan pri mwayen rive nan pri ki wo

​Pwogram sa yo anjeneral koute plis men souvan yo mwens chè pase kan ki trè espesyalize yo. 

​Kan pou lajounen atravè gwoup prive oswa lekòl 

​Kan pou lajounen sa yo konsantre sou enterè espesifik tankou espò, atizana ak teyat, kodaj oswa robotik (aprann pwograme òdinatè oswa konstwi robo), ak aktivite nan lanati. Pri yo ka diferan, men yo anjeneral mwens chè pase kan kote timoun yo rete pase nwit lan. 

​Kan relijye oswa kiltirèl 

​Gen kèk legliz, moske, sinagòg, ak sant kiltirèl ki ofri pwogram ete. Pwogram sa yo ka konsantre sou anseye valè, tradisyon, oswa yon lang espesifik. Yo souvan eseye kenbe pri yo abòdab pou fanmi yo. 

​Pwogram espesyalize pou òganizasyon  ki pa la pou fè lajan 

​Gwoup tankou 4-H, Girl Scouts, ak Boy Scouts ofri aktivite andedan ak deyò. Pwogram sa yo ka varye ant evènman yon sèl jou ak yon semèn konplè. Yo souvan gen opsyon ki pa koute chè epi yo ka ofri èd finansye. 

​Kan pou pase nwit (Kan pou dòmi) 

​Kan sa yo ofri aktivite deyò tradisyonèl tankou randone, naje, ak espò ekip. Gen kèk ki dire yon semèn, alòske gen lòt ki dire tout ete a. Malgre yo jeneralman pi chè, anpil ofri èd finansye pou ede ak depans yo. 

​Pwogram Preparasyon Akademik ak Kolèj 

​Inivèsite oswa lekòl prive ofri pwogram sa yo. Yo konsantre sou sijè tankou ekriti, STEM (syans, teknoloji, jeni, matematik), oswa biznis. Pwogram sa yo souvan pou elèv lekòl presegondè ak segondè. Malgre ke yo ka chè, yo enpòtan pou preparasyon pou kolèj ak pou bati CV.  

​Kan Espesyalite (Atizana Pèfòmans, Teknoloji, Espò Avanse) 

​Kan sa yo se pou timoun ki gen yon gwo enterè nan yon konpetans espesifik, tankou dans, teyat, kodaj avanse, antrènman espòtif, oswa e-espò (jwèt videyo konpetitif). Yo souvan chè paske yo bay enstriktè ekspè ak enstalasyon espesyalize. 

​Èd Finansye ak Fason pou Diminye Pri (Bous Detid)

​Anpil kan — menm kan prive oswa ki chè — ofri èd finansye oswa pri ki baze sou revni. Toujou mande anplwaye kan an dirèkteman si yo ofri: 

• ​Èd finansye (èd pou peye frè yo) 
• ​Rabè pou frè ak sè (yon pri ki pi ba si ou voye plis pase yon timoun nan fanmi ou) 
• ​Pri ki pi ba pou enskripsyon bonè (pafwa yo rele yo kontra enskripsyon bonè) 

​Kijan pou enskri (Enskri)

​Chak kan oswa pwogram gen pwòp fason pa yo pou fanmi yo enskri. Anjeneral, ou ta dwe: 

1. ​Vizite sitwèb kan an. Anjeneral, ou ka jwenn li lè w chèche non kan an sou entènèt. 
2. ​Chèche yon "fòm enskripsyon" oswa yon "fòm aplikasyon". Se fòm sa a ou ranpli pou enskri pitit ou a. 
3. ​Chèche konnen ki lè ou bezwen soumèt fòm nan (dat limit aplikasyon an). 
4. ​Aprann kijan pou peye nenpòt frè. Pou kèk pwogram, ou ka bezwen bay:

• ​Fòm medikal (enfòmasyon sou sante pitit ou a). 
• ​Prèv rezidans (yon dokiman ki montre ou rete nan yon zòn patikilye, tankou yon bòdwo sèvis piblik oswa yon kontra lokasyon). Kan an ap di w sa yo aksepte. 

​Li toujou yon bon lide pou enskri bonè si ou kapab. Kan popilè yo ka plen byen vit, epi ou vle asire w pitit ou a jwenn yon plas.​