Yon Gid pou Achte Manje Ozetazini

Ozetazini, opsyon ak kote pou achte manje ka varye selon kote w ap viv la. Li ka vo lapèn pou vwayaje pi lwen pou ale nan yon magazen ki gen pi bon pri ak pi bon seleksyon manje pou ekonomize lajan. Pafwa, ou ka bezwen vizite plizyè kalite magazen pou jwenn atik ou vle yo. Si ou gen yon telefòn entelijan oswa aksè a yon òdinatè, ou ka itilize yon aplikasyon kat tankou Google Maps pou jwenn kote yo vann manje. 

Men kèk diferan kote anjeneral pou achte manje Ozetazini:  

• Sipèmache yo anjeneral pi bon opsyon pou achte prèske tout kalite manje a bon pri. Yo pibliye rabè ak koupon chak semèn sou sit entènèt sipèmache yo, aplikasyon telefòn yo, ak feyè jounal nan magazen an. Magazen sa yo souvan gen "koulwa entènasyonal," kote ou ka jwenn manje tradisyonèl nan peyi ou.
• Magazen bwat yo se gwo magazen ki vann manje ak prèske tout lòt bagay ou ta ka bezwen, tankou machandiz kay oswa rad. Souvan (men pa toujou), magazen yo ka difisil pou jwenn aksè nan transpò piblik, men pri yo ap pami pi bon ou ka jwenn. Walmart ak Target se egzanp magazen bwat ki vann manje.
• Boutik katye yo ak chèn magazen yo se kote nan katye a ki vann bagay ou bezwen, men souvan yo pi chè paske yo fasil pou jwenn epi pafwa yo rete ouvè lajounen kou lannwit. Boutik sa yo ka itil si ou bezwen kèk bagay oswa sa ou bezwen pou fè yon manje, men ou pa ta dwe konte sou yo pou fè tout acha ou.  
• Magazen espesyalize yo vann manje, souvan espesifik pou sèten peyi, kilti, oswa kwizin. Ou ka jwenn yon magazen espesyalize toupre w ki vann engredyan ki difisil pou jwenn pou fè manje ak resèt popilè nan peyi  kote w soti. Gen lòt magazen espesyalize ki vann sèlman sèten kalite manje, tankou fwomaj, epis, pwason, vyann, oswa bagay dous.
• Mache kiltivatè yo se kote nan vil yo kote kiltivatè yo vann fwi ak legim fre. Mache sa yo souvan ouvè yon jou nan semèn nan pandan sezon rekòt la. Nan kèk zòn ki pi cho, mache kiltivatè yo ouvè tout tan nan ane a. Menm si pafwa yo pi chè, mache sa yo se yon bon kote pou jwenn manje fre, ki bon pou sante, ki soti nan zòn nan. Ou ka chèche sou entènèt oswa mande yon moun nan katye a ou fè konfyans si gen yon mache kiltivatè toupre.

Sonje byen: Li toujou bon pou ou konnen opsyon pou achte manje nan kominote w la. Konesans sa a ka fè w ekonomize lajan epi ogmante kalite manje w ap achte a.