Rete An Sekirite Nan Moman Gen Gwo Chalè

Fatig Chalè ak Koudchalè  

Koudchalè ak fatig chalè se maladi grav ki ka rive lè kò a ekspoze nan gwo tanperati epi li pa ka rafwadi kòmsadwa. Menmsi yo sanble nan kèk bagay, yo gen karakteristik ak nivo gravite diferan. 

Fatig chalè se yon kondisyon ki souvan rive lè yon moun ekspoze nan gwo tanperati epi li fè aktivite fizik difisil oswa li pase anpil tan nan yon anviwonman cho. Sentom fatig chalè gen ladan swe anpil, fatig, tèt vire, kè plen, vomisman, tèt fè mal, kranp nan misk, ak kè ki bat vit. Si yo pa okipe l vit, fatig chalè ka mennen nan yon kondisyon pi grav yo rele koudchalè. 

Koudchalè se yon kondisyon grav ki ka menase lavi lè tanperati santral kò a monte nan nivo danjere, anjeneral pi wo pase 104°F (40°C). Koudchalè ka devlope vit epi li mande atansyon medikal imedyatman. Siy ak sentòm koudchalè gen ladan tanperati kò ki wo, konfizyon oswa dezoryantasyon, po cho ak sèk, respirasyon rapid ak fèb, kè ki bat vit, gwo tèt fè mal ki pa sispann, kè plen ak vomisman, oswa pèdi konesans. 

Fatig chalè ak koudchalè se kondisyon grav, epi li esansyèl pou chèche atansyon medikal. Si w sispèk youn nan kondisyon sa yo, aji imedyatman pou kenbe kò a fre ak dlo oswa sak glas. Travay vit pou diminye tanperati kò a ka ede evite konplikasyon epi sove lavi.  

Kijan Pou Rete An Sekirite Pandan Gwo Chalè 

• Bwè anpil dlo pandan tout jounen an, menm si w pa santi w swaf. Evite bwè twòp bwason ki gen kafeyin oswa alkòl paske yo ka fè w dezidrate. Toujou pote yon boutèy dlo ou ka reitilize avèk ou, epi si w ap fè aktivite fizik, asire w ranplase likid pi souvan. 
• Mete rad lejè, laj, ak koulè klè ki pèmèt kò w respire. Mete twal natirèl tankou koton oswa len ki ede kenbe w fre. Evite koulè fonse paske yo gen tandans absòbe chalè. Si w deyò, konsidere mete yon chapo ak gwo rebò ak linèt solèy ki pwoteje kont reyon iltravyolèt (UV) pou pwoteje tèt ou ak je w kont solèy la. 
• Limite tan ou pase dirèkteman anba solèy. Si posib, rete anndan nan espas ki gen è kondisyone oswa kote ki gen vantilè. Si w oblije deyò, eseye planifye aktivite yo pandan pati ki pi fre nan jounen an, tankou bonè nan maten oswa ta nan aswè. Chèche lonbray nenpòt kote ou kapab epi pran repo regilyèman nan kote ki pi fre pou bay kò w yon chans pou rafwadi. 
• Aplike krèm solèy ki gen yon gwo SPF (Faktè Pwoteksyon Solèy) sou po ki ekspoze, omwen 15 a 30 minit anvan ou soti deyò. Remete krèm solèy chak de zèdtan, oswa plis si w ap swe anpil oswa w ap benyen. Epitou, itilize bòm pou lèv ki gen SPF pou pwoteje lèv ou kont boule solèy. 
• Si w pa gen aksè ak è kondisyone, sèvi ak vantilè oswa ouvri fenèt pou fè lè sikile. Fèmen rido oswa pèsyèn pandan pati ki pi cho nan jounen an pou bloke solèy la. Si posib, sèvi ak kouvèti fenèt ki reflete oswa aplike fim ki reflete chalè sou fenèt yo pou diminye absòpsyon chalè. Konsidere sèvi ak yon vantilè ki voye ti gout dlo fre oswa konprès frèt pou ede bese tanperati kò w. Anpil kominote tou ouvri sant refwadisman ijans ki gen è kondisyone pandan gwo chalè. Ou ka rele nimewo enfòmasyon vil oswa bouk ou a, tcheke sit entènèt yo, oswa mande yon vwazen ede w jwenn yon sant refwadisman ijans. 

Tibebe, timoun piti, granmoun aje, ak moun ki gen pwoblèm sante deja pi fasil pou tonbe malad akoz chalè. Asire yo gen aksè ak yon anviwonman fre epi yo bwè ase likid. Ofri èd bay moun ki ka bezwen li epi ankouraje yo chèche atansyon medikal imedyatman si yo montre siy fatig chalè oswa koudchalè.