Kijan pou prepare pou yon tranblemandtè

Tranblemandtè yo parèt pi souvan nan kèk eta pase nan lòt, men yo ka rive nenpòt kote nan Etazini. Si w ap viv nan Alaska, Kalifòni, Washington, Oregon, Hawaii, lès Missouri, lès Arkansas, lwès Tennessee, lwès Kentucky, nan kèk pati nan lès South Carolina, ak Puerto Rico, ou gen plis chans pou w fè eksperyans gwo tranblemanntè. Ou ka wè yon kat jewografik ki montre kote gwo tranblemanntè yo gen plis chans rive nan Etazini. 

Swiv konsèy sa yo pou prepare epi pwoteje fanmi w nan ka ta gen yon tranblemanntè. 

Idantifye danje potansyèl lakay ou 

• Fikse etajè yo nan miray yo 
• Gwo objè oswa bagay lou ka blese ou si yo tonbe. Mete yo sou etajè ki pi ba yo 
• Sere bagay ki ka kraze tankou asyèt ak nenpòt bagay ki fèt an vè nan kabinèt ki ba, fèmen ak loket 
• Pann bagay lou tankou foto ak miwa lwen kabann, kanape, ak nenpòt kote moun dòmi oswa chita. 
• Fikse aparèy limyè ki anlè nan plafon yo 
• Fikse aparèy chofaj dlo yo lè w mare yo nan miray la epi boulonnen yo nan planche a 
• Sere pwodui pou touye move zèb, pestisid, ak pwodui ki ka pran dife sou etajè ki anba yo nan kabinèt fèmen ak seri 

Prepare yon "Twous Ijans" 

Apre yon tranblemandtè, ou ka pa gen aksè ak dlo, manje, elektrisite, oswa lòt nesesite pandan yon semèn oswa menm plis. Se poutèt sa li enpòtan pou prepare epi kenbe yon twous ijans ki fasil pou itilize. Vizite sit Settle In nan a pou wè atik ki pale sou sa ki ta dwe genyen nan yon twous ijans.  

Devlope yon Plan Kominikasyon Pou Ka Ijans 

• Fè yon plan pou ka ta gen manm fanmi ki separe youn ak lòt nan yon tranblemanntè (yon posibilite reyèl pandan jounen an lè granmoun yo nan travay epi timoun yo nan lekòl). 
• Apre yon ijans, rezo telefòn lokal yo ka debòde ak anpil moun k ap rele oswa voye mesaj tèks an menm tan. Li ka pi fasil pou rele sou long distans. Si ou gen yon zanmi oswa yon fanmi nan yon lòt eta, mande yo pou sèvi kòm "kontak fanmi an" ki ka transmèt mesaj yo an ka ta gen yon ijans. Asire w tout moun nan fanmi an konnen non ak nimewo kontak fanmi an. 

Kisa pou fè pandan yon tranblemandtè   

• Si w andedan kay la, chache yon kote pou w kouvri w anba yon tab oswa yon mèb solid epi kenbe l jiskaske tranbleman an kanpe. Si pa gen yon tab tou pre, deplase nan yon kwen bilding lan lwen vit epi rete atè a ak bra w kouvri tèt ou. Rete andedan jiskaske tranbleman an sispann epi ou sèten ou ka soti san danje. Yon fwa deyò, deplase lwen bilding yo pou ale nan yon espas ouvè. Anseye tout moun nan kay la konsèy ijans sa yo. 
• Kenbe soulye yo toupre kote w ap dòmi an. Sa ap pwoteje pye w kont nenpòt vè ki kraze pandan tranblemandtè an. 

Kisa pou w fè apre yon tranblemandtè 

Apre yon tranblemanntè, li pi enpòtan pou w ale nan yon kote ki an sekirite. Si w kapab, pote twous ijans ou avèk ou. Tcheke pou wè si gen blesi ak danje, epi ede lòt moun. Yon fwa ou an sekirite, swiv plan ijans pou tranblemanntè ou te prepare a pou kominike epi rekonekte ak manm fanmi w yo. 

Sèvi ak telefòn ou kòm yon zouti avètisman bonè pou tranblemandtè 

Si w ap viv nan eta Kalifòni, Oregon, oswa Washington, ou ka telechaje aplikasyon MyShake la kounye a, ki ka ba w tan pou w al kache anvan tranblemanntè a kòmanse nan zòn ou an. Sistèm nan itilize detèktè pou detekte tranblemanntè ki deja kòmanse epi li bay yon alèt sou telefòn ou, pou ba w avètisman kèk segonn anvan tranblemanntè a kòmanse. 

Epi kounye a, nan Kalifòni, teknoloji avètisman bonè pou tranblemanntè genyen otomatikman nan plizyè milyon telefòn Android san w pa bezwen telechaje yon aplikasyon. Sistèm sa a itilize kote jeneral telefòn ou an, kidonk li enpòtan pou w aktive sèvis lokalizasyon yo. Ou ka gade yon videyo sou kijan telefòn Android nan Kalifòni ka avèti w si yo detekte yon tranblemanntè. 

Si w resevwa yon alèt tranblemandtè sou telefòn ou, ou pral sèlman gen kèk segond pou reyaji anvan, kidonk imedyatman mete kò w deyò jan sa eksplike pi wo a epi avèti tout moun bò kote w pou yo fè menm jan an tou.