Rete An Sekirite Pandan Siklòn

Siklòn se gwo tanpèt ki ka lakoz gwo dega nan kay ak enfrastrikti, epi ki reprezante gwo risk pou lavi moun. Byen prepare epi konnen kijan pou rete an sekirite pandan yon siklòn enpòtan anpil pou nenpòt moun ki rete oswa ki vizite zòn kote tanpèt sa yo konn rive. 

Siklòn fòme sou Oseyan Atlantik la. Yo ka grandi vit pou vin gwo tanpèt ki kouvri plizyè santèn kilomèt, epi yo ka frape anpil zòn anmenm tan. Ou plis gen risk pou  siklòn  afekte w si w rete nan Sid Texas, Louisiana, Mississippi, Alabama, Florida, Georgia, South Carolina, North Carolina, Virginia, District of Columbia, Maryland, Delaware, lès Pennsylvania, New Jersey, lès New York, Connecticut, Massachusetts, New Hampshire, ak Maine.  Menm si w pa rete bò lanmè, siklòn ka rive kote w ye a tou, epi yo ka pote gwo lapli, inondasyon, van ki fè ravaj, ak menm tònad. Sezon siklòn lan kòmanse premye jen epi l fini 30 novanm. 

Rete Enfòme 

Toujou chèche dènye nouvèl nan sous ou ka fye tankou National Hurricane Center (Sant Nasyonal Siklòn), biwo ijans lokal yo, ak estasyon nouvèl yo. Suiv avètisman yo bay pou zòn kote w rete a. Konnen diferans ant yon "hurricane watch" (siklòn ka rive) ak yon "hurricane warning" (siklòn ap vini kan menm).  

Prepare Yon Kit Ijans 

Kreye yon kit ijans lontan anvan nenpòt menas siklòn epi asire w ou gen ase manje ak dlo pou yon dire senk jou. Konnen dlo tiyo ou ka kontamine apre yon siklòn epi si yo bay yon avètisman siklòn, etajè magazen yo ka vid rapidman dlo, manje, ak lòt pwovizyon enpòtan. Pou plis enfòmasyon sou kit ijans, vizite paj Settle In sa a. 

Pwoteje Pwopriyete W 

Pran prekosyon pou pwoteje kay ou kont dega posib. Koupe branch bwa ak ti pyebwa, mare bagay deyò ki lach, epi ranfòse pòt ak fenèt. Mare oswa antre anndan poubèl, mèb deyò, gri, oswa nenpòt ekipman ki ta ka vin danjere nan gwo van. 

Kite Zòn nan Lè Yo Di W Ale 

Si otorite yo di w kite zòn nan, pa pran sa nan jwèt, ale touswit. Konnen ki wout pou w pran davans epi swiv wout evakiyasyon yo. Deside kote w prale anvan sa rive lakay yon zanmi oswa fanmi, nan yon otèl, oswa nan yon abri ofisyèl. Pati bonè pou w pa pran nan gwo trafik ak danje sou wout. Sonje: li toujou pi bon pou w pwoteje tèt ou olye w pran chans.  

Kreye Yon Plan Ijans  Pou Fanmi W 

Devlope yon plan ijans fanmi epi asire tout moun nan kay la konprann li. Etabli yon kote pou rankontre si nou separe. Bay chak manm fanmi responsablite, tankou rasanble dokiman enpòtan, prepare kit ijans la, oswa pran swen bèt kay yo. Pataje plan ou ak fanmi oswa zanmi ki pa nan zòn ki afekte a pou yo ka rete ajou sou kote ou ye. 

Rete An Sekirite Pandan Tanpèt La 

Si w pa kapab evakye, pran prekosyon ki nesesè: 

• Rete anndan, lwen fenèt ak vit. 
• Kenbe rido, pèsyèn oswa twal fenèt yo fèmen pandan tanpèt la pou pwoteje kont vit fenèt ki kase. 
• Chèche abri nan yon ti chanm anndan kay la ki pa gen fenèt, sou etaj ki pi ba a. 
• Swiv mizajou meteyoloji ak alèt ijans. 
• Kenbe kit ijans ou ak yon rezèv dlo fre fasil pou jwenn. 
• Sèvi ak flach pou limyè olye balèn, paske yo reprezante risk pou dife. 
• Evite sèvi ak aparèy elektrik ak telefòn ki gen fil pandan tanpèt la. 
• Rete branche sou otorite lokal yo pou mizajou ak enstriksyon. 

Apre Tanpèt La 

Menm apre siklòn lan fin pase, li enpòtan pou rete vijilan epi swiv konsiy sekirite yo. Rete lwen zòn ki inonde, fil elektrik ki tonbe, ak debri. Fè atansyon ak danje ki ka genyen tankou estrikti bilding ki fèb oswa dlo ki kontamine. Evalye anviwonman ou epi swiv direksyon ofisyèl ijans yo.