Kisa Degèpisman ye?

Yon degèpisman se yon aksyon legal mèt kay la ka pran pou fini kontra lwayè w la epi fòse w kite kay ou t ap lwe a. Yo ka voye avi degèpisman an ba ou nan lapòs, pa sèvis livrezon, oswa yo ka ba ou li nan men ou dirèkteman. Si yo mete ou deyò, sa ap gen move efè sou aplikasyon lwayè ou nan lavni.  

Rezon pou Degèpisman ak Kijan pou Evite Yo Mete w Deyò 

• Pa peye lwaye a se rezon ki pi kouran pou degèpisman. Nan pifò eta, si ou an reta ak peman lwaye w la, lalwa di mèt kay la dwe ba ou yon avi alekri ki di w gen yon kantite jou pou peye lwaye ou dwe a oswa pou kite kay la. Si ou pa fè ni youn ni lòt, mèt kay la ka ale nan tribinal pou mande degèpisman. Nan kèk eta, lalwa pa mande mèt kay la ba ou avi alekri anvan li kòmanse pwosesis degèpisman an. Kèlkeswa eta ou rete a, li enpòtan pou peye lwaye ou anvan dat limit ki ekri nan kontra a. Li enpòtan tou pou pale ak mèt kay la regilyèman. Si lwaye ou pral an reta men ou ka peye li aprè, fè mèt kay la konnen imedyatman. Mèt kay la pa oblije aksepte aranjman peman an, men li ka dakò travay avèk ou. Men, si ou peye lwaye ou an reta plis pase youn oswa de fwa, ou mete tèt ou nan risk pou yo mete ou deyò. 
• Li enpòtan pou ou konprann tout règ ki ekri nan kontra lwayè w la. Si w pa respekte règ yo oswa si w inyore responsablite lokatè ki nan kontra a, ou riske pou yo mete w deyò. Pa egzanp, si kontra a pa pèmèt bèt kay, pa kenbe bèt kay. Oswa, pa kite plis moun rete nan kay la pase sa kontra a pèmèt. Si ou resevwa yon avètisman nan bouch oswa alekri nan men mèt kay la ki di ou kase yon règ nan kontra a, aji touswit pou rezoud pwoblèm nan. 
• Yo ka mete w deyò si ou patisipe nan nenpòt aktivite ilegal. Si ou pa sèten si yon bagay yo mande w fè legal — pou fè lajan, pa egzanp — mande yon anplwaye nan ajans reyentegrasyon an. 

Kisa Mwen Dwe Fè si Mwen Resevwa yon Avi Degèpisman? 

Pa inyore li! Aji imedyatman epi fè bagay sa yo: 

• Pale dirèkteman ak mèt kay la epi chèche konnen si gen yon fason ou ka evite yo mete w deyò. 
• Si w pa ka jwenn yon aranjman ak mèt kay la, chèche èd legal touswit. Si w t ap travay ak yon ajans relokalizasyon, yo ta dwe kapab refere ou bay gwoup lokal ki ka ede w jwenn asistans legal gratis oswa ki pa chè. 

Si w pa konekte ak yon ajans reyentegrasyon, resous sa yo ka ede w jwenn sèvis legal gratis oswa ki pa chè: 

• Òganizasyon State Side Legal gen yon lis òganizasyon sèvis legal nan chak eta kote ou ka jwenn èd legal gratis si ou satisfè kondisyon finansye yo. Ou ka itilize kat la tou pou jwenn òganizasyon toupre w. 
• Legal Services Corporation (LSC) se yon òganizasyon san pwofi gouvènman ameriken an te kreye ki bay lajan pou èd legal pou Ameriken ki gen ti revni. Sou sit entènèt òganizasyon an, antre adrès ou pou jwenn yon òganizasyon èd legal LSC finanse ki toupre ou. 

Sonje byen, antanke yon lokatè responsab, ou gen dwa tou. Yo pa ka mete w deyò si ou peye lwaye ou alè epi ou swiv règ ki ekri nan kontra a. Epi mèt kay la pa ka mete w deyò paske ou plenyen oswa depoze plent sou kondisyon ilegal oswa kondisyon ki pa an sekirite nan kay la. Si ou santi yo vle mete w deyò san rezon valab, yon avoka ka ede w konteste degèpisman an epi li ka fè li posib pou ou rete nan kay la jiskaske kontra a fini.