အမေရိကန်ပြည်ထောင်စုရှိ အိမ်ရာ
အိမ်ရာဆိုင်ရာ အကူအညီ
အမေရိကန်ပြည်ထောင်စုတွင် အိမ်ရာအကူအညီသည် အကန့်အသတ်ရှိပြီး စောင့်ဆိုင်းစာရင်းရှိတတ်ပါသည်။ အိမ်ရာ အကူအညီ အစီအစဉ်ကို ပြည်နယ် သို့မဟုတ် ဒေသန္တရ အဆင့်တွင် စီမံခန့်ခွဲလေ့ရှိသည်။ ယင်းအစီအစဉ်များတွင် အကျုံးဝင်မှုသည် ကွဲပြားမှုများ ရှိပြီး လျှောက်ထားသူ၏ ဝင်ငွေ သတ်မှတ်ချက်ဘောင်ဝင်မှသာ ခွင့်ပြုပါသည်။ သင်၏ဝင်ငွေ အကန့်အသတ်ရှိပါက အိမ်ငှားခြင်းသည် သင့်အတွက် အဆင်မပြေနိုင်ပါ။ သင့်တွင် ပုံမှန်ဝင်ငွေ ရှိလာပါက သင့်လိုအပ်ချက်၊ ဝင်ငွေတို့နှင့် ကိုက်ညီသည့် အိမ်ကို ရွေးနိုင်ပါသည်။
ပရိဘောဂများ
အိမ်တွင် ပရိဘောဂများတပ်ဆင်ခြင်းသည် ခက်ခဲနိုင်ပါသည်။ သို့သော် ယူအက်စ်သို့ ရောက်လာသော လူသစ်များအား ကူညီပေးနိုင်သည့် အရင်းအမြစ်များ၊ နည်းလမ်းများ ရှိရာတွင် ပရိဘောဂဘဏ်များ၊ ပစ္စည်းဟောင်းအရောင်းဆိုင်များ၊ အွန်လိုင်းမှ ရောင်းချခြင်းများ၊ ကွန်မြူနတီ သို့မဟုတ် အကျိုးအမြတ်မယူသည့် အဖွဲ့များလည်း ပါဝင်ပါသည်။ ဤအဖွဲ့များသည် မြို့အလိုက် ကွဲပြားမှု ရှိသည့်အတွက် သင့်အနီးအနားတွင် ရနိုင်မှုများကို လေ့လာစုံစမ်းခြင်းအားဖြင့် သင်၏ ကုန်ကျစရိတ်ကို လျှော့ချနိုင်သည်။ အိမ်ထောင်ပရိဘောဂ အများအပြားမှာ တပတ်ရစ်များဖြစ်နိုင်ကြောင်း သိထားပါ။ သင်သည် ပုံမှန်ဝင်ငွေရလာချိန်တွင် သင်၏ နှစ်သက်မှုနှင့် ငွေကြေး အခြေအနေပေါ်မူတည်ပြီး ရွေးချယ်နိုင်ပါသည်။
အိမ်ရာကုန်ကျစရိတ်
အမေရိကန်ပြည်ထောင်စုတွင် အိမ်ရာများ ဈေးကြီးပြီး နေစရာရှာဖွေခြင်းသည် ခက်ခဲပါသည်။ လူအများအပြားက အိမ် သို့မဟုတ် တိုက်ခန်းများကို ငှားရမ်းနေထိုင်ပြပါသည်။ ပြည်နယ်၊ မြို့နှင့် ဝန်းကျင်ပေါ်မူတည်ပြီး အိမ်ရာဈေးနှုန်းများ အလွန်ပင် ကွာခြားပါသည်။ မည်သည့်နေရာတွင် နေထိုင်သည်ဖြစ်စေ အိမ်ရာကုန်ကျစရိတ်သည် သင်၏ လစဉ်အသုံးစရိတ်တွင် အများဆုံးဖြစ်လိမ့်မည်။ အိမ်ပြောင်းရန် ဆုံးဖြတ်ပါက သင်၏ အိမ်ငှားစာချုပ်အရ အိမ်ရှင်အား ကြိုတင် အကြောင်းကြားရန် လိုပါသည်။ ပြောင်းရွှေ့ခြင်းကလည်း ဈေးကြီးပါသည်။ ထို့ကြောင့် အိမ်ငှားစာချုပ်ကို မရပ်မီ ကုန်ကျစရိတ်ကို သင်က ကျခံနိုင်ခြင်းရှိမရှိ စိစစ်ပါ။
အိမ်ရာဆိုင်ရာ အခွင့်အရေးနှင့် တာဝန်များ
အမေရိကန်ပြည်ထောင်စုတွင် အိမ်ရှင်၊ အိမ်ငှား နှစ်ဦးစလုံး အခွင့်အရေးနှင့် တာဝန်များ ရှိကြပါသည်။ သင်က တိုက်ခန်း သို့မဟုတ် အိမ်ကို ငှားပါက အငှားစာချုပ် ဟု ခေါ်သည့် သဘောတူညီချက်ကို သင် လက်မှတ်ရေးထိုးရပါသည်။ ယင်း အငှားစာချုပ်တွင် သင်က အိမ်ငှားဖြစ်ပြီး အိမ်ရှင်ထံမှ အချိန်ကာလတစ်ခုအကြာငှားရမ်းကြောင်း၊ အိမ်လခနှင့် ရေခမီးခကို အချိန်မှန် ပေးချေမည့်အကြောင်း၊ အိမ်ရာကို မပျက်စီးရန် ထိန်းသိမ်းမည့်အကြောင်း သဘောတူရပါသည်။ သင်လက်မှတ်ထိုးထားသည့် အငှားစာချုပ်ကို ချိုးဖောက်ခြင်း (အငှားစာချုပ် သက်တမ်းမကုန်မီ ထွက်ခြင်း) ကြောင့် ဒဏ်ကြေးပေးဆောင်ရနိုင်ပြီး သင်၏ ငွေချေးငှားနိုင်မှု အဆင့်သတ်မှတ်ချက်အပေါ် ထိခိုက်နိုင်စေသည်။ အကယ်၍ ပြောင်းရွှေ့ပါက ယူအက်စ် အစိုးရ၊ စာတိုက် စသည်တို့ကို အကြောင်းကြားခြင်း အပါအဝင် သင်လုပ်ဆောင်ရမည့်အရာများ ရှိပါသည်။
အိမ်ရှင်၏ တာဝန်များ
အိမ်ရာဥပဒေများသည် အိမ်ရှင်နှင့် အိမ်ငှား နှစ်ဦးစလုံးအပေါ် သက်ရောက်ပါသည်။ အိမ်ရာသည် ငှားရမ်းနိုင်ရန်အတွက် သတ်မှတ်ထားသော လုံခြုံမှု၊ သန့်ရှင်းမှုတို့နှင့် ပြည့်မီရမည် ဖြစ်သည်။ လျှပ်စစ်၊ ရေဆင်းမှု၊ အပူပေးစနစ်များအားလုံး ကောင်းမွန်သည့် အနေအထားတွင်ရှိရန် အိမ်ရှင်က သေချာစေရမည်။ မီးခိုးငွေ့သတိပေးစက် တပ်ဆင်ထားပြီး ပိုးမွှားနှင့် ကြွက်များ မရှိကြောင်း သေချာစေရမည်။ အိမ်ရာဥပဒေများအရ အိမ်ငှားများ၏ လူမျိုး၊ မူရင်းနိုင်ငံ၊ ဘာသာ၊ လိင်၊ မိသားစု အခြေအနေ သို့မဟုတ် ရုပ်ပိုင်း/စိတ်ပိုင်း ဆိုင်ရာ အခြေအနေများကြောင့် အိမ်ရှင်က ငြင်းပယ်ခြင်း မပြုရပါ။
အိမ်နီးချင်းကောင်း ဖြစ်ခြင်း
အမေရိကန်ပြည်ထောင်စုတွင် အိမ်နီးချင်းကောင်းဆိုသည်မှာ သူ၏အိမ်အနီး သို့မဟုတ် တိုက်ခန်းအနီးနေထိုင်သူများအတွက် ထည့်သွင်းစဉ်းစားပေးသူ ဖြစ်သည်။ အိမ်နီးချင်းကောင်းသည် တိုက်ခန်းအဆောက်အအုံ၏ အများသုံးနေရာကို သန့်ရှင်းစွာ ထားရှိသူ၊ အိမ်ဖြစ်ပါက ခြံတွင်း မြက်ရိတ်ခြင်း၊ အမှိုက်သိမ်းသည့်နေ့တွင်သာ အမှိုက်ပုံးထုတ်ခြင်းတို့ ပြုလုပ်သည်။ အများအတွက် ထည့်သွင်းစဉ်းစားပေးသော အိမ်နီးချင်းသည် အခြားသူများအား အနှောက်အယှက် မဖြစ်စေရန် အလို့ငှာ ညဘက်တွင် ဆူညံသံများ လျှော့ချပေးသည်။
နောက်ဆုံးရ အချက်အလက်
ပိုမိုသိရှိရန်
အမေရိကန်တွင် လူအများအပြားသည် အိမ်ငှား သို့မဟုတ် အိမ်ကို ရှယ်၍ နေကြသည်။ သင်က အိမ်ရှာပါက သင်၏ ဝင်ငွေထွက်ငွေ၊ ပုံမှန်အားဖြင့် သင့်နေရာရှိ အိမ်ငှားခနှင့် နေအိမ်တွင် သင့်အတွက် အရေးကြီးသော အချက်ကို နားလည်ရန် လိုအပ်သည်။
နေအိမ်ကို မည်သို့ လုံခြုံရန် စီမံနိုင်ကြောင်း သိရှိခြင်းသည် အရေးကြီးသည် – သင့်အတွက်၊ သင်နှင့် နေထိုင်သူများအတွက်နှင့် သင့် အိမ်နီးချင်းတို့အတွက် ဖြစ်သည်။
အမေရိကန်နိုင်ငံသို့ရောက်လျှင် သင်၏ အိမ်သည် တီဗီရှိုးများ၊ ရုပ်ရှင်များ၊ ကြော်ငြာများတွင် တွေ့ရသကဲ့သို့ မဟုတ်ကြောင်း သိရန် လိုအပ်သည်။ အမေရိကန်နိုင်ငံရှိ လူအများစုသည် အိမ်ငယ်လေးများနှင့် တိုက်ခန်းများတွင် ရိုးရိုးကုတ်ကုတ်သာ နေထိုင်ကြသည်။ အမေရိကန်နိုင်ငံတွင် နေအိမ်မလုံလောက်မှု ရှိကြောင်း သင်သိရန်လည်း...