Kwiga Icyongereza
Kwiga Icyongereza
Niba utavuga Icyongereza, kwimukira muri Amerika bishobora gusa nk'ibiguteye ubwoba. Gusabana n'abandi, gushaka akazi, ndetse no guhaha ibiribwa bizakugora kubera ko utavuga neza Icyongereza. Ariko, kwiga Icyongereza bizagufasha cyane mu kumenyera neza umuryango mushya ugiyemo. Kwiga kuvuga no kumenya Icyongereza bizagufasha kurushaho kwigira, gushaka akazi gahemba neza, ndetse no gushyikirana n'inshuti n'abaturanyi bashya. Ushobora kuba udafite igihe kinini cyo kwiga Icyongereza mbere yo gushaka akazi, ariko umaze kubona akazi, bizagusaba gufatanya kwiga Icyongereza no gukora. Kugeza umaze kumenya Icyongereza kurushaho, hari serivisi z'ubusemuzi zitangirwa ahantu nko mu bitaro no mu nkiko zihabwa abazikeneye.
IBYIZA BYO KWIGA ICYONGEREZA
Icyongereza ni ururimi rukunda gukoreshwa cyane muri Amerika kandi abantu benshi muri Amerika ntibazabasha kukuvugisha cyangwa kukumva nutiga Icyongereza. Kwiga Icyongereza ni ngombwa kugira ngo ubeho unatere imbere. Niba ufite abana, kumenya Icyongereza bizagufasha kuvugana n'abo ku kigo cy'ishuri abana bawe bigaho. Uzanakenera kwiga Icyongereza kugira ngo ube umuturage uvugana n'abandi kandi ufite amakuru mu mujyi na leta ubamo. Uzakenera kwiga Icyongereza kugira ngo ukore ibizamini byo gusaba ubwenegihugu bw'Amerika.
Uziga Icyongereza byihuse kurushaho niba wifuza cyane kwiga ururimi. Dore impamvu kwiga Icyongereza ari ingenzi:
- Kubona akazi no kugera ku ntego zawe mu kazi.
- Kuvugana n'abarimu bigisha abana bawe.
- Kumenya ibyo abana bawe n'abuzukuru bawe bari kuvuga.
- Kwigenga: gufata imodoka rusange ndetse no kujya guhaha uri wenyine ndetse unari kumwe n'umuryango wawe.
- Kuvugana n'abaturanyi bawe.
- Kumenya ibiri kubera ku isi binyuze kuri televiziyo, ibinyamakuru, na interineti.
- Gukora ikizamini cyo kugirwa Umunyamerika kugira ngo ubone ubwenegihugu bw'Amerika.
- Kuvugana n'abo mukorana ndetse n'abo mu muryango mugari.
- Gusaba kubonana na muganga ndetse no kuvugana na bo udakoresheje umusemuzi.
AMASOMO Y'ICYONGEREZA
Imyinshi mu miryango iha amasomo y'Icyongereza abimukira n'impunzi bamaze igihe gito bageze muri Amerika.
Mu masomo y'Icyongereza, abagabo n'abagore bafite imyaka itandukanye, bize amashuri atandukanye, ndetse banakomoka mu moko atandukanye bose barigana. Mu masomo y'abatangizi, akenshi abanyeshuri biga Icyongereza cyoroheje kandi bakoresha, abakigera muri Amerika bifuza kumenya kugira ngo basabane n'abandi. Urugero: Ushobora kwiga interuro z'Icyongereza kugira ngo zigufashe mu guhahira mu iduka, gusoma ingengabihe ya bisi, cyangwa gushakisha akazi. Amwe mu mashuri yigisha Icyongereza gikenewe mu kazi runaka; nko gukorera muri hoteli cyangwa gukora mu bijyanye n'ubuganga. Mu masomo y'abo mu rwego rwo hejuru, abanyeshuri bibanda cyane ku kibonezamvugo cy'Icyongereza, gusoma, no kwandika. Hari kandi amashuri y'Icyongereza ategura abanyeshuri bagiye kujya mu mashuri yisumbuye.
UBUNDI BURYO BWO KWIGA ICYONGEREZA
Hari uburyo butandukanye bwo kwiga Icyongereza. Akenshi guhuza uburyo bubiri ni byo bitanga umusaruro cyane. Ahakurikira hari zimwe mu ngero z'uburyo bwo kwiga Icyongereza utari mu ishuri:
Kwigira Icyongereza ku kazi. Iyo ubonye akazi, ushobora kwiga inyunguramagambo n'imvugo z'Icyongereza z'ingirakamaro muri ako kazi. Uzaba ufite abo mukorana ndetse biranashoboka ko abakiriya bazaba bavuga Icyongereza. Kuvugana na bo bizagufasha kumenya Icyongereza kurushaho.
Kwigira Icyongereza mu muryango mugari ubamo. Ugomba gusabana no kwifuza guhura n'abantu bashya. Kuvugana n'abantu utazi mu maduka ndetse no kwitoza Icyongereza hamwe n'inshuti cyangwa abaturanyi bishobora kubanza kukugora, ariko abantu benshi baba ari abagwaneza kandi barafasha. Kujya mu itsinda cyangwa gutangiza itsinda nyunguranabitekerezo ku muco mu rurimi rw'Icyongereza mu rusisiro utuyemo no guhura ku buryo buhoraho kugira ngo muvuge Icyongereza gusa. Gutegura ibikorwa bwo kwishimisha n'itsinda nko gusura ingoro ndangamurage cyangwa gutembera muri parike. Ubu ni uburyo bwiza bwo kwitoza kuvuga Icyongereza hamwe n'abandi biga urwo rurimi cyangwa basanzwe bavuga Icyongereza. Binashobora kuba uburyo bwiza bwo kumenya ibyerekeye umuco n'imigenzo by'Abanyamerika.
Kwiyigisha. Itere umwete wo kwiga Icyongereza aho waba ubishoboreye hose n'igihe ubishoboye cyose. Ushobora kubikora ureba filime cyangwa ibiganiro byo kuri televiziyo biri mu Cyongereza, cyangwa wumva ibiganiro kuri radiyo biri mu Cyongereza. Bika urutonde rw'amagambo mashya wize ndetse unagerageze gusoma Icyongereza cyanditse ku byapa biri ku mihanda, ku mabisi, no ku madirishya y'amaduka.
Kwigira hamwe nk'umuryango. Buri wese mu muryango wawe azigana Icyongereza nawe. Bikore ku buryo biba igikorwa gishimishije mu muryango mukina imikino y'ururimi rw'Icyongereza ndetse no kugira igihe mukavuga “Icyongereza gusa” mu rugo buri munsi. Gira uruhare mu bikorwa byo ku ishuri umwana wawe yigaho uba umukorerabushake kugira ngo ufashe mu bikorwa byo mu ishuri ndetse n'ibyihariye. Abana biga indimi nshya vuba, rero ni ingenzi ko ukomeza kugendana na bo.
KWIGA ICYONGEREZA BIFATA IGIHE
Ugitangira, ushobora kubona ko bigoye kwiga Icyongereza maze ukumva birakurakaje. Birasanzwe ko wumva umeze utyo. Buri muntu yiga ku muvuduko no mu buryo butandukanye. Ugomba kugerageza uburyo butandukanye kugira ngo urebe ubukunogeye kurushaho. Ibanga mu kwiga ururimi rushya ni ukurwitoza buri munsi. Nubwo waba wumva radiyo cyangwa ukareba televiziyo mu Cyongereza iminota icumi gusa ku munsi, ibi nabyo birafasha. Uko iminsi ihita ndetse no gukomeza kwitoza bigera aho ukumva wisanzuye kurushaho mu kuvuga Icyongereza kandi bigufasha kukorohereza kumenyera muri Amerika. Bifata igihe ariko bigenda byoroha uko ukomeza kugerageza.
